RIRHANDZU I BOFU

Reads: 148  | Likes: 1  | Shelves: 1  | Comments: 0

  • Facebook
  • Twitter
  • Reddit
  • Pinterest
  • Invite

Status: In Progress  |  Genre: Romance  |  House: Booksie Classic

"Ndzi kayela n'wayitelo wa wena wo vangama o nge i khwezu nyeleti ya mahlamba-ndlopfu xiluva xa mbilu yanga". Ku vula Kulani.
"Ndza khensa ku twa sweswo murhandziwa, u ngava u ri kule na mina kambe u tshama u ri emiehleketweni ya mina vusiku na nhlikani". Ku vula Rixongile.
Maxelo yo titimela a ya vangiwa hi mpfula ya xihangu leyi a ya ha ku heta kuna, nkwangula tilo a wu hlovise xibakabaka hi le vuxeni.
Rirhandzu ra lava mbirhi ri sungule loko vahari exikolweni xa le henhla xa Magulasavi eka Makhuva.
Loko matshalatshala yo ya eyunuvhesiti ya nga humelelangi eka Rixongile u ti sungulele xikolo xa tindzumula, Kulani yena u yile exilungwini kuya lava ntirho.
Rixongile Rikhotso u thyile xikolo xa yena vito ra Ritlhavile, a ri ehofisini loko ku ta gongondza Mercy Makhubele eka nyangwa lowu a wu pfuleke swintsongo.
"Nghena". Ku vula Rixongile a nga langutangi na ku i mani loyi a gongondza.
"Vaxumi sesi Xongi". Ku xumisa Mercy.
"Ahee mhani Makhubele, hi lo dyoha yini?". A pfala laptop a ti komba ku hlamala.
Rixongile a hlamarisiwa hi ku hambi leswi a va nghena kereke swin'we a va nga tolovelanangi ku vanga vhakelana na swona a kuri ro sungula Mercy a nghena exikolweni.
"Mi nga kali mi vilela a mi dyohangi nchumu". Ku vula Mercy a lo yima.
Rixongile u suke a yima a sula xitulu xa sofa "Hi lexi xitulu". A xi tshuneta ekusuhi na Mercy.
"Ndza khensa". A veka xibekani ehenhla ka tafula a tshama hansi.
"Manana Makhubele mi nga tsakela kofi?". Ku vutisa Rixongile.
"Ee". A pfumela na hi nhloko a karhi a n'wayitela.
"Beatrice ndzi kombela tikhapi timbirhi ta kofi". A huwelela Beatrice loyi a ri eku yimbelele ekhixini.
Mercy na Rixongile a va khongela eka kereke yin'we leyi nuna wa Mercy a ri xandla xa mufundhisi eka yona na swona a va hlonipheka swinene.
Mercy na nuna wa yena Gideon a va tsakela Rixongile hi kwalaho ka migingiriko ya yena ekerekeni.
"Mi ta ndzi khomela ku va ndzi fikile swa xitshuketa, ndzi ringetile ku mi bela riqingho kambe a ri timiwile". Ku vula Mercy.
"Mi ta ndzi khomela a hi ri na nhlengeletano na vatswari va vana". Ku hlamula Rixongile.
"Hiswona ndzi rhumiwe hi mkhalabya ekaya Makhubele va te ndzi mi vutisa loko kuri mi tava mi nga khomekangi hi mqhivela mi hi endzela ekaya". Ku vula Mercy.
Mbilu ya Rixongile a yi vandlamula kunene loko a twaku Mercy u rhumiwe hi nuna wa yena.
U langutile eka riqingho ra yena loko kuri u tava a xo xi endla hi ku ku sukela a sungule xikolo xa tindzumula a tshamela ro famba tinhlengeletano na hi mahelo ya vhiki.
"Ndzi tava ndzi nga endli nchumu a mi switivi ku vangava va ndzi lavela yini". Ku vutisa Rixongile.
"Mi nga kali mi chava vo tsakela ku mi hi endzela hi ta dya swakudya swa namadyambu na n'wina". Ku vula Mercy.
"Ndzi fika nkarhimuni?". Ku vutisa Rixongile a different karhi a kanakana.
"Awara ya mune yi ngava kahle". Ku hleketelela Mercy.
Hi siku leri tlhandlameke dyambu a ri dlaya na vusokoti hi ku hisa swi nga tshembhi no i nguva ya xixika.
Xirhambo xa vona a kuri ku lava ku hlanganisa Rixongile na n'wana wa vona Vusi. N'wana wa vona a ri yexe.
Vusi a ha ku vuya hile Cuba laha a thwasele kona vudokodela.
Vusi a nga tivi hi vanhu vo tala eka Makhuva hi ku u kulele eNghilandhi laha vatswari va yena a va tshama kona loko va ngase vuya ekaya.
Gideon na Mercy Makhubele hambi leswi a va dyondzekile hi vumbirhi bya vona va tlhela va tshama endzhanzheni malembe yo halyard a va nga lahlangi xinto.
N'hwenyani a nga ngheni eka vona loko a ambale buruku leswi swi nga endla ku Rixongile a ehleketa hi ka mbirhi hi ka nharhu leswi a fanele a swi ambala loko a ya eka vona.
U hetelele a ambale rhoko yo tshuka yo leha ku fika swikun'wanini yi tlhela yi siya makatla.
Gideon u sukile a landza Rixongile eka vona.
Va fambile ku kondza va ya fika eka Makhubele kuri hava mabulu tani hi leswi Gideon a nga toloveriwangi hi vanhu ekerekeni na le tikweni.
Vatswari va Rixongile a va nga switivi kuri u rhandzana na Kulani tani hi leswi a va hlonipha ngopfu ku fika ku a nga avelana na vona mhaka ya ku rhandzana ka yena hambi kuri ekerekeni a va nga switivi.
Kulani a swi tsakerile ku Rixongile a nga nwu tivisa eka vatswari va yena kambe yena a ala.
Swi fikile laha Kulani a nga ehleketelela ku kumbe kuna loyi a nga nwu tivisa eka vatswari va yena.
"Rixongile loyi i Vusi n'wana wa hina". Ku vula Mercy.
"Vusi loyi i Rixongile, mudyondzisi wa vana va xikolo xa sonto hala tlhelo u na xikolo xa tindzumula". Ku vula Mercy.
"Ndzi tsakela ku kutiva Rixongile". Ku vula Vusi.
"Ndza khensa na mina ndzi tsakela ku mi tiva". A n'wayitela.
"U tsakela yini swo nwa?". Ku vutisa Mercy.
"Mati ya lunghile". A n'wayitela.
Marcy u yile ekhixini a landza mati hi nghilazi leyikulu.
"Vusi u ta komba Rixongile yindlu". Ku vula Mercy.
Gideon na Mercy va tekile xiboho xo hlanganisa Vusi na Rixongile endzhaka loko Vusi a tava a vuye na n'hwenyani wun'wani hi le Cuba loyi a nwu hundza hi nkombo wa malembe.
Mhaka ya malembe a yi ngari xiphiqo ngopfu eka vona a va nyangatsiwa ngopfu hi leswi a nwa a tlhela a dzaha.
"Rixongile a va nga ndzi byelangi ku kutava na muyeni kambe va tshamela ku vulavula swo tala swa kahle hi wena". Ku vula Vusi.
"Buti Vusi ndzi kombela u ndzi vitana Xongi". Ku vula Rixongile a tsakela ku vitaniwisa leswi a tolovele ku vitanisiwa xiswona.
"Hiswona Xongi na mina ndzi kombela u ndzi vitana Vusi". Ku kombela Vusi.
Rixongile a swi nwu olevelangi tani hi leswi ekerekeni a va tolovele ku hloniphana.
"Laha a ndzi ri na khume ra malembe hi endzela eFu....".
"Efurwa". Ku nghenelela Rixongile.
"U swi vona njhani?". Ku vutisa Vusi a ri karhi a n'wayitela.
"Ndzi vona hi xihondzo lexi". A kombetela xihondzo xa ndhuma xa le Furwa.
Va fikile va tshama exirhapeni laha a kuri na xitulu xo ringana vanhu vambirhi a xi ri ehansi ka murhi lowu a wu dzudza makamba yo oma.
"Va ndzi byerile swo tala hi wena kambe lexi ndzi lavaku ku xi tiva sweswi tani hi loko u sungurile xikolo xa tindzumula milorho ya wena sweswi i ku fikelela yini?". Ku vutisa Vusi.
"Ku tsakela ka mina a kuri ku dyondzela vu social worker kambe loko mhaka ya swa timali yi vile xiphiqo ndzi sungule xikolo xa tindzumula hi xikongomelo xo hlengeleta mali yo yisa milorho ya mina emahlweni yo dyondzela social worker". Ku hlamusela Rixongile.
Riqingho ra Rixongile ri ririle u langute Vusi a tlhela a ri languta a nga ri hlamuli.
"Ku ngava kuri na leswi ndzi swi kavanyetaku?". Ku vutisa Vusi.
U hundzulukile a nwu languta a dzungudza nhloko "Ku ha...". riqingho ri ririle kambe a nga se heta ku vulavula.
Vito ra Kulani ri tsayiterile eka riqingho ra Rixongile na kambe a ya emahlweni a honisa ku hlamula.
"Hi xikongemelo xo ka xi nga tiveka a wu suki emiehleketweni ya mina". Leri a kuri rungula ro huma eka Kulani. Rixongile a nga hlamulangi ku kotisa masiku leswi a va endlisa xiswona.
"Xongi ndzi rhandza mianakanyo ya wena yo hluteka hi ndlela leyi u ti karhataka hi yona ku lava ku fikelela milorho ya wena na vurhena lebyi u nga na byona. Ndzi tsakela leswi u nga xiswona u sasekile, ndzi tsakela ku u va ntombhi ya mina". Ku phofula Vusi.
"Buti Vusi ndza khensa kuva mi ndzi phofulele ma ti twele ya n'wina hi mina kambe kuna munhu loyi hi nga tshembhisana ku tekana". Ku hlamula Rixongile.
"Ndza swi twisisa, a ndzi nga swi tivi ku u na munhu loyi u rhandzanaka na yena u vile na nkateko kuva a kume munhu wo fana na wena". Ku ti tshandza Vusi.
"Ndzi khensa loko mi kote ku swi twisisa mi munhu wa kahle ndzi navela ku mi nga kuma n'hwenyani wa milorho ya n'wina". Ku khongotela Rixongile.
"Ndzi khensa nkarhi lowu u nga ndzi nyika wona ndzi ti phinile swinene kahle handleka mbuyelo kambe ndzi switwisisile". Ku vula Vusi.
Mercy a rina ku tshembha ku Vusi u tava a pfumeriwini hi Rixongile. U nyikile Vusi movha wa yena ku a heleketa Rixongile.
Vusi u vuyile a rhwale saka ra tingana eka vatswari va yena leswi swi nga va tshova timbilu va tlhela va hlamarisiwa hi ku twa ku u na munhu loyi a rhandzanaku na yena.
"Ndzi tsandzeka ku tikhoma ndzi n'wayitela ndzi nga heti loko ndzi vona xinepe xa wena". Ku vula Kulani.
"Ndzi ti twa ndzi nga hetisekangi loko u ri kule na mina". Ku hlamula Rixongile.
Endzhaka ko khomisiwa tingana va kunguhate kuya vulavula na vatswari va yena, lava na vona va nga hlamarisiwa hi ku twa ku Rixongile u na muhlekisani. Endzhako vekiwa ehansi ntshikelelo hi vatswari va yena u hetelele a pfumerini ku rhandzana na Vusi.
Hambi leswi a kova rirhandzu ro sindzisiwa a ri khuluka bya magandlati ya lwandle.
"Ndzi navela o nge ndzi nga va ndzi sungule swilo hinkwaswo na wena". Ku vula Vusi.
Rixongile u lo n'wayitela a vukarha Vusi.
Mahungu yo ka ya nga etleleki endleleni Kulani u twile hi mahungu-ndlela ku ntombhi ya yena yi rhandzana na Vusi. Swi nwu tsone vurhongo a davula ya sala ya nga a ya ekaya.
Kulani u ti vonele hi ya yena matihlo laha a nga kolwa hi yo oxa hambi leswi a swi nga tshembhisi.
"A swi olovi ku swi amukela kambe ndza boheka, ndza ku ntshunxa hambi leswi mbilu yi vavaku, ndzi khensa nkarhi lowu u nga ndzi nyika wona ndzi ku navelela ntsako no humelela eka milorho ya wena na leyi a hi yi kunguhate swin'we ndzi ta ku tsundzuka hi masiku". Ku ti tshandza Kulani rito ri rina mahlehleleti a hundzuluka a famba.
Marito ya Kulani ya nwutlhavile mihloti yi hobomula kunene a tsandzeka ku ti khoma.
Endleleni yo ya ekaya Rixongile u hlangane na Vusi.
"Vusi ndzi karhele ku hanyela ku tsakisa vatswari va mina na wena swa mina na wena swi herile." Ku vula Rixongile.
"Ndzi ta endla xin'wani na xin'wani ku ku vona u tsakile". Ku tshembhisa Vusi.
A nga hlamulangi u lo ala a famba a nga languti na le ndzhaku.
Vusi u yile ekaya a va chela hi mahungu yo tsema na nhlana.
Va fambile na yena ekava Rixongile ku lava kuya twisisa ku xivangelo ku ngava kuri yini.
"Ndzi tekile xiboho xo vuyelana na Kulani sweswi hambi koba lexi dumaku hi ngehe hambani ndzi ti tekele xiboho hi ndzexe". Ku hlambanya Rixongile.
Vusi na vatswari va yena va nghenile va kuma njhekanjhekisano wo ponisa rirhandzu ra vona wu hake rimitsu.
Rixongile u hluvurile xingwavila xa xitshembhiso lexi Vusi a nwu ambexe xona a nwu nyika.
"Vamaseve ku tswala i ku huma moya". Ku vula tata wa Rixongile.
"Mi vurisile va ri a wu tswali mbilu u tswala mizimbha". Ku pfumela Makhubele.
Endzhaka n'hweti Kulani u vuyile ekaya endzhaka loko Rixongile a nwu komberile.
"Muendliwa a nga rivali ku rivala muendli ndzi kombela u ndzi rivalela eka hinkwaswo leswi ndzi nga ku endla swona hi lunghisa timhaka ta hina". A ti tsongahata.
"Endzhaka hinkwaswu leswi u nga ndzi endla swona ndza ha ku rhandza Xongi". Ku vula Kulani.
Rixongile u khavaxerile mihloti a tisola kuva a tshikile Kulani ehandle ka xivangelo.
Hi siku ra nhungu ra ndzhati a kuri siku ro velekiwa ra Rixongile, vatirhi kuloni va yena va nwu endlele ntlangu wa xihlamariso laha a va twanane na Kulani.
Kulani u vuyile hi le joni Rixongile a karhi a nga switivi, loko ntlangu wu karhi wu ya emahlweni va tlangela siku ra yena ro velekiwa Kulani u fikile swi nga languteriwangi a humesa xibokisani lexi a xi ri na xingwavila xa nsuku a ku "Rixongile Rikhotso wa pfumela ndzi ku teka u va nsati wa mina xana?". A nwu kombela a lo khidzama.
Varithikulorhi na vanghana va yena va ku "Ina" loko van'wani va ku pfumela.
Rixongile u pfumerile hi nhloko a pfale na nomo, matihlo ya tenga-tenga mihloti.

"Ndzi ku tsundzuka nkarhi hi nkwawo xiluva xa mbilu yanga". Ku vula Kulani.


Submitted: June 09, 2021

© Copyright 2021 Forster Ngobeni. All rights reserved.

  • Facebook
  • Twitter
  • Reddit
  • Pinterest
  • Invite

Add Your Comments:


Facebook Comments

More Romance Short Stories

Other Content by Forster Ngobeni